കേരളം ആസ്ഥാനമായ പ്രമുഖ ബാങ്കിതര ധനകാര്യ സ്ഥാപനവും മുൻനിര സ്വർണപ്പണയ സ്ഥാപനവുമായ മുത്തൂറ്റ് ഫിനാൻസിന്റെ ഓഹരികള്‍ റെക്കോർഡ് ഉയരത്തില്‍.എൻഎസ്‌ഇയില്‍ 2,261.40 രൂപയില്‍ ഇന്നലെ വ്യാപാരം തുടങ്ങിയ ഓഹരി, ഒരുഘട്ടത്തില്‍ 2,308.95 രൂപയെന്ന റെക്കോർഡ് ഉയരം തൊട്ടു.
ഇന്നലത്തെ സെഷൻ അവസാന മിനിറ്റുകളിലേക്ക് കടക്കുമ്ബോള്‍ വ്യാപാരം നടന്നത് 1.38% ഉയർന്ന് 2,270 രൂപയില്‍.കേരളത്തില്‍ നിന്നുള്ള ഏറ്റവും മൂല്യമേറിയ ലിസ്റ്റഡ് കമ്ബനിയുമായ മുത്തൂറ്റ് ഫിനാൻസിന്റെ വിപണിമൂല്യം 91,000 രൂപയും ഭേദിച്ചു. 90,000 കോടി രൂപയെന്ന നാഴികക്കല്ല് പിന്നിടുന്ന ആദ്യ കേരളക്കമ്ബനിയെന്ന നേട്ടവും മുത്തൂറ്റ് ഫിനാൻസിന് സ്വന്തം.
58,998 കോടി രൂപ വിപണി മൂല്യവുമായി കല്യാണ്‍ ജ്വല്ലേഴ്സാണ് കേരളക്കമ്ബനികളില്‍ മൂല്യത്തില്‍ രണ്ടാമത്. ഫാക്‌ട് (58,262 കോടി രൂപ), ഫെഡറല്‍ ബാങ്ക് (45,200 കോടി രൂപ), കൊച്ചിൻ ഷിപ്പ്‍യാർഡ് (37,452 കോടി രൂപ) എന്നിവയാണ് തൊട്ടടുത്തുള്ള സ്ഥാനങ്ങളില്‍.
ഇക്കഴിഞ്ഞ ഒക്ടോബർ-ഡിസംബർ പാദത്തില്‍ മുത്തൂറ്റ് ഫിനാൻസ് മികച്ച പ്രവർത്തനമാണ് കാഴ്ചവച്ചതെന്ന വിലയിരുത്തലുകളുടെ കരുത്തിലാണ് ഓഹരികളുടെ നേട്ടം. ഡിസംബർപാദ പ്രവർത്തനഫലം കമ്ബനി ഫെബ്രുവരി 12ന് പുറത്തുവിടും.
നടപ്പുവർഷത്തെ (2024-25) ആദ്യപാതിയില്‍ (ഏപ്രില്‍-സെപ്റ്റംബർ) കമ്ബനിയുടെ തനി വായ്പാമൂല്യം 90,197 കോടി രൂപയെന്ന റെക്കോർഡ് ഉയരത്തിലെത്തിയിരുന്നു. സ്വർണപ്പണയ വായ്പകളില്‍ 28% വാർഷിക വർധനയുണ്ടായതാണ് നേട്ടമായത്. ഡിസംബർ പാദത്തിലും ഈ ശ്രേണിയില്‍ മികച്ച വളർച്ചയുണ്ടായെന്ന് കരുതുന്നു.
ഏപ്രില്‍-സെപ്റ്റംബറില്‍ സംയോജിത (ഉപകമ്ബനികളുടെയും ചേർത്ത്) വായ്പാമൂല്യം ഒരുലക്ഷം കോടി രൂപയെന്ന നാഴികക്കല്ലും പിന്നിട്ടിരുന്നു. ഈടുരഹിത വായ്പകള്‍ക്കുമേല്‍ റിസർവ് ബാങ്ക് നിയന്ത്രണം കടുപ്പിച്ചതോടെ സ്വർണപ്പണയ വായ്പകള്‍ക്ക് ഡിമാൻഡ് ഏറിയതും സ്വർണവിലയിലെ സമീപകാല റെക്കോർഡ് മുന്നേറ്റവും, മുത്തൂറ്റ് ഫിനാൻസിന്റെ ഗോള്‍ഡ് ലോണ്‍ വിതരണ വളർച്ച മെച്ചപ്പെടാൻ സഹായിച്ചുവെന്നാണ് വിലയിരുത്തലുകള്‍.
കഴിഞ്ഞ ഒരുവർഷത്തിനിടെ നിക്ഷേപകർക്ക് 66% നേട്ടം സമ്മാനിച്ച ഓഹരിയാണ് മുത്തൂറ്റ് ഫിനാൻസ്. കഴിഞ്ഞ മൂന്നു മാസത്തിനിടെ മാത്രം ഓഹരിവില 18 ശതമാനത്തിലധികവും ഉയർന്നു.
