ലോകശ്രദ്ധ നേടിയ സയാമീസ് ഇരട്ടകളാണ് അബിയും ബ്രിട്ടാനി ഹെൻസലും.1996 -ല്‍ ഓപ്ര വിൻഫ്രെ ഷോയിലൂടെയാണ് ഇവർ ശ്രദ്ധേയരായത്.ഇവരുടെ ജീവിതവും നേരിടേണ്ടിവന്ന പ്രതിസന്ധികളും അറിയാത്തവരായി അധികമാരും ഉണ്ടാകില്ല.ഇപ്പോഴിതാ ഇരട്ടകള്‍ വിവാഹിതരായി എന്ന വാർത്തയാണ് പുറത്ത് വരുന്നത്.2021 -ല്‍ യുഎസ് ആർമി വെറ്ററൻ ജോഷ് ബൗളിംഗുമായിട്ടായിരുന്നു ഇരട്ടകളില്‍ ഒരാളായ അബിയുടെ വിവാഹം.പീപ്പിള്‍ മാഗസിനാണ് ഇക്കാര്യം വെളിപ്പെടുത്തിയിരിക്കുന്നത്.
എബിയും ഹെൻസലും തങ്ങളുടെ ഫേസ്ബുക്ക് പ്രൊഫൈല്‍ ചിത്രം മാറ്റിയിട്ടുണ്ട്. വിവാഹവസ്ത്രത്തില്‍ എബിയും ഹെൻസലും മറുവശത്ത്, ചാരനിറത്തിലുള്ള സ്യൂട്ട് ധരിച്ച്‌ ബൗളിംഗ് നില്‍ക്കുന്നതും ഫോട്ടോയില്‍ കാണാം.ഹെൻസല്‍സിൻ്റെ ഫേസ്ബുക്ക് പേജും പ്രൊഫൈല്‍ ഫോട്ടോ ആക്കിയിരിക്കുന്നത് അങ്ങനെ ഒരു ചിത്രം തന്നെയാണ്. ബൗളിംഗിൻ്റെ ഫേസ്ബുക്ക് പ്രൊഫൈലില്‍ അദ്ദേഹം ഇരട്ടകള്‍ക്കൊപ്പം ഐസ്ക്രീം കഴിക്കുന്നതും ഒരുമിച്ച്‌ യാത്ര ചെയ്യുന്നതുമായ ചിത്രങ്ങളും പങ്കുവച്ചിട്ടുണ്ട്. വിവാഹത്തിൻ്റെ വീഡിയോകളും ചിത്രങ്ങളും ഇതിനകം സോഷ്യല്‍ മീഡിയയില്‍ വൈറലാണ്.
ടുഡേയിലെ ഒരു റിപ്പോർട്ട് പ്രകാരം, അബിയും ബ്രിട്ടാനിയും ഇപ്പോള്‍ അഞ്ചാം ക്ലാസ് അധ്യാപകരാണ്. അവർ ജനിച്ച മിനസോട്ടയില്‍ തന്നെയാണ് ഇരുവരും താമസിക്കുന്നത്. ഇരുവരും തങ്ങളുടെ സ്വകാര്യജീവിതം അധികം പരസ്യമാക്കാൻ ഇഷ്ടപ്പെടുന്നില്ല. അതേ തുടർന്നാണ് വിവാഹവാർത്ത പോലും ഇത്രമാത്രം വൈകി പുറത്തെത്തുന്നത് എന്ന് വ്യക്തമാണ്.
ടിഎല്‍സി പരമ്ബരയായ ‘എബി ആൻഡ് ബ്രിട്ടാനി’ -യിലൂടെയാണ് ഇരട്ടകള്‍ പ്രശസ്തരായത്. കഴുത്തിന് താഴേക്ക് ഇരുവരും ഒരേ ശരീരമാണ് പങ്കിടുന്നത്. അബി വലതുഭാഗവും ബ്രിട്ടാനി ഇടതുഭാഗവും നിയന്ത്രിക്കുന്നു. 1990 -ലാണ് ഇരട്ടകള്‍ ജനിച്ചത്. അവരുടെ ഇരുവരേയും വേർപിരിക്കുന്ന ശസ്ത്രക്രിയ നടത്തുന്നില്ല എന്ന് മാതാപിതാക്കള്‍ തീരുമാനിക്കുകയായിരുന്നു. ശസ്ത്രക്രിയ ചെയ്താല്‍ ഇരുവരുടെയും ജീവൻ രക്ഷപ്പെടാനുള്ള സാധ്യത വളരെ കുറവാണ് എന്ന് ഡോക്ടർമാർ പറഞ്ഞതിനെ തുടർന്നായിരുന്നു ഇത്.
