ആഭരണ പ്രേമികളെ ഞെട്ടിച്ചുകൊണ്ടാണ് ഇപ്പോള്‍ സ്വർണ വിലയിലെ കുതിപ്പ്. പവന് എല്ലാ ദിവസവും വില കൂടുന്നുണ്ട്.500 ഉം 600 ഉം രൂപയുടെ വ്യത്യാസം ആണ് സ്വർണ വിലയില്‍ ഉണ്ടാകുന്നത്. വില കയറി കയറി നിലവില്‍ 63,520 രൂപയാണ് ഒരു പവൻ സ്വർണത്തിന്റെ വില.2023 മുതല്‍ ആണ് സ്വർണ വിലയില്‍ മുൻപെങ്ങുമില്ലാത്ത തരത്തില്‍ വർദ്ധനവ് ആരംഭിച്ചത്. റഷ്യ- യുക്രെയ്ൻ യുദ്ധമായിരുന്നു ഇതിലേക്ക് നയിച്ചത്.
ആഗോളതലത്തില്‍ യുദ്ധം ഉണ്ടാക്കിയ ആശങ്ക സ്വർണ വിലയില്‍ ആയിരുന്നു പ്രതിഫലിച്ചത്. സുരക്ഷിത നിക്ഷേപം എന്ന നിലയില്‍ ആളുകള്‍ വ്യാപകമായി സ്വർണം വാങ്ങിക്കൂട്ടാൻ ആരംഭിച്ചു. ഇതോടെ വിലയും വർദ്ധിക്കാൻ ആരംഭിച്ചു. രണ്ട് വർഷം കൊണ്ട് സ്വർണ വിലയില്‍ 30,000ത്തലധികം രൂപയുടെ മാറ്റം ആണ് ഉണ്ടായത്.
വിവാഹ ആവശ്യത്തിനായി സ്വർണം വാങ്ങുന്നവരെ ആണ് ഈ വില വർദ്ധനവ് സാരമായി ബാധിക്കുക. 20 പവന്റെ സ്വർണം വാങ്ങാൻ ആഗ്രഹിച്ചവർക്ക് ഇനി ആ തുക കൊണ്ട് 10 ഓ 15 ഓ പവന്റെ സ്വർണം മാത്രമാണ് ലഭിക്കുക. സ്വർണത്തിന്റെ വിലയ്ക്ക് പുറമേ പണിക്കൂലി, നികുതി എന്നിങ്ങനെ വീണ്ടും പണം നല്‍കേണ്ടിവരുന്നു. ഇങ്ങനെ ഇപ്പോള്‍ ഒരു പവൻ സ്വർണം വാങ്ങണം എങ്കില്‍ 70,000 രൂപ നല്‍കേണ്ടിവരും.എന്നാല്‍ വർദ്ധിച്ചുവരുന്ന വില വർദ്ധനവിലും നമുക്ക് സ്വർണം വാങ്ങുമ്ബോള്‍ ലാഭം ഉണ്ടാക്കാൻ കഴിയും എന്നതാണ് വാസ്തവം. 18 കാരറ്റ് സ്വർണം ആണ് ഇതിന് സഹായകമാകുന്നത്.
ഇന്ന് സ്വർണ കടകളില്‍ നിന്നും 22 കാരറ്റ് സ്വർണാഭരണങ്ങള്‍ ആണ് ലഭിക്കുന്നത്. ഇത് വാങ്ങണമെങ്കിലാണ് മേല്‍പറഞ്ഞ തുക നല്‍കേണ്ടിവരിക. ഇത്തരം ആഭരണങ്ങളില്‍ 91.6 ശതമാനം ശുദ്ധമായ സ്വർണം ആയിരിക്കും. എന്നാല്‍ 18 കാരറ്റ് സ്വർണത്തില്‍ 75 ശതമാനം ആയിരിക്കും സ്വർണം ഉണ്ടാകുക. ബാക്കി ചെമ്ബ്, വെള്ളി എന്നീ ലോഹങ്ങള്‍ ആയിരിക്കും. സ്വർണത്തിന്റെ അളവ് കുറവായതുകൊണ്ട് തന്നെ ഇതിന് പണവും കുറവ് ആയിരിക്കും.
22 കാരറ്റ് സ്വർണത്തിന് 63,560 രൂപ നല്‍കേണ്ടിവരുമ്ബോള്‍ ആ സ്ഥാനത്ത് 18 കാരറ്റ് സ്വർണം ഒരു പവന് 52,008 രൂപ നല്‍കിയാല്‍ മതിയാകും. അതായത് 12,000 രൂപയുടെ വ്യത്യാസം വരും. നിലവില്‍ 6,501 രൂപയാണ് 1 ഗ്രാം 18 കാറ്റ് സ്വർണത്തിന്റെ വില.
സ്വർണം വാങ്ങുമ്ബോള്‍ സ്വർണ വിലയുടെ ശതമാനക്കണക്കിനാണ് പണിക്കൂലി ഈടാക്കുക. അതിനാല്‍ 18 കാരറ്റ് സ്വർണം വാങ്ങുന്നതുവഴി ഇത് കുറയ്ക്കാൻ സാധിക്കും. സ്വർണത്തിന്റെ വിലയും പണിക്കൂലിയും അടക്കമുള്ള തുകയിലാണ് ജിഎസ്ടി ഈടാക്കുന്നത്. ഇതിലും കുറവ് ലഭിക്കും.
അതേസമയം സ്വർണവിലയിലെ വർദ്ധിച്ചത് ആളുകളെ 18 കാരറ്റ് സ്വർണത്തിലേക്ക് ആകർഷിച്ചിട്ടുണ്ട്. മികച്ച ഡിസൈനുകള്‍ നിർമ്മിക്കാൻ 22 കാരറ്റിനെക്കാള്‍ നല്ലത് 18 കാരറ്റ് ആണ്. അതുമാത്രവുമല്ല പെട്ടെന്ന് കൈമോശം വരികയും ഇല്ല. ദീർഘനാള്‍ ഇത് ഉപയോഗിക്കാം. അതുകൊണ്ട് തന്നെ ഇപ്പോള്‍ ആളുകള്‍ 18 കാരറ്റ് സ്വർണാഭരണങ്ങള്‍ വ്യാപകമായി വാങ്ങുന്നുണ്ട്.
